Інтэрактыўная гульня Гандаль

Матэрыялы: Пластыкавыя кубачкі, каляровая папера, клейкая стужка.

Ход гульні: Удзельнікі сядаюць у кола. Вядоўца ў сярэдзіну кола выстаўляе загадзя падрыхтаваныя пластыкавыя кубачкі. Кубачкі маюць налепкі ў выглядзе трох розных фігурак (напрыклад, квадрат, трохкутнік і круг). У кожным з кубкаў розная колькасць нарэзаных каляровых паперак – грошай. Зялёныя – вартасцю 500 адзінак, чырвоныя – 200, сінія – 100. Але ў кубках з аднолькавымі фігуркамі аднолькавыя сумы грошай (пра гэта не гаворыцца). Вядоўца прапануе выбраць кожнаму сабе кубак, і пераклеіць налепку з фігуркай сабе на адзеньне, як бэджык.

На вялікі аркуш паперы ці дошку запісваюцца імёны гульцоў і іх адзнакі (фігуркі на бэджах). Вядоўца прапануе кожнаму палічыць свае грошы, але нікому пра гэта не гаварыць. Затым вядоўца тлумачыць ўмовы гульні. Мэта гульні – быць першым, г.зн. назбіраць як мага больш грошай. Для гэтага кожны гулец можа заціснуць у кулак любую суму грошай і падысці да іншага з прапановай – “гандаль”.

Другі гулец таксама заціскае ў кулак грошы, пасля чаго кулакі расціскаюцца. Перамагае той, у каго на далоні сума грошай аказалася большай. Ён забірае і тыя грошы, што былі ў суперніка ў кулаку. Гульня пачынаецца і перапыняецца па камандзе вядоўцы і мае адно правіла: нельга адмаўляцца ад гандлю. Усё астатняе – дазволена. Пра гэтае правіла вядоўца нагадвае некалькі разоў.

Гандаль доўжыцца 5 хвілін. Вядоўца перапыняе гульню і прапануе палічыць грошы. Вынікі запісваюцца на вялікім аркушы паперы. Вядоўца тлумачцьць, што па камандзе пачнецца другі этап. Мэта яго – атрымаць грошы: можна зарабляць, выпрошваць і г. д. Забарона застаецца адна – нельга адмаўляцца ад гандлю. Гульня доўжыцца яшчэ 5 хвілін. Пасля гульцы зноў вяртаюцца ў кола, і вядоўца абвяшчае, што праз 5 хвілін будзе трэці этап гульні, але правілы будуць выпрацаваны толькі адной камандай – “квадратамі”. Удзельнікі з бэджамі ў выглядзе квадратаў для выпрацоўкі новых правілаў маюць 5 хвілін і сыходзяць у іншае памяшканне.

Пасля вяртання, адбываецца заключны этап гульні паводле новых правілаў.

Пытанні пасля сканчэння гульні (могуць мяняцца, ў залежнасці ад мэты, дзеля якой праводзіцца гульня):

• Як вы сябе адчуваеце? (адказваюць усе гульцы па чарзе)
• Што вам дапамагала, што перашкаджала дасягнуць мэты?
• Што можна было зрабіць інакш?
• Ці была выпрацавана агульная стратэгія?
• Якія думкі ў вас узніклі?
• Як гэта стасуецца да жыцьця?